Costa Rica VS Serbia | Preview

Russia 2018 - අපි දකින විදිය

බ්‍රසීලයේ පැවැත්වුන 2014 FIFA World Cup එකේදි තරඟාවලිය උඩු යටිකුරු කරපු කණ්ඩායම තමයි කොස්ටරීකා කණ්ඩායම. 2014දී ඔවුන්ගේ ඉරණම විදියට මුළු ලෝකයාම බලාපොරොත්තුවෙන්  හිටියේ පළවෙනි වටයේදීම තරඟාවලියෙන් ඉවතට විසිවෙලා ගෙවල් බලා යාවි කියලා වුනත්, ලෝකයේ නම් දරාපු කණ්ඩායම් තුන හතරකට කළින්ම ගෙදර යන්න සළස්වමින් කොස්ටරීකාව අර්ධ අවසාන පූර්ව වටය දක්වා දුර ගමනක් පැමිණියා. එතෙක් මෙතෙක් තුළ කොස්ටරීකාව FIFA World Cup එකකදී දක්වපු ඉහළම දක්ෂතාවය තමයි 2014 බ්‍රසීලේදී ඔවුන් ඒ පෙන්නුම් කෙරුවේ.

එදායින් අවුරුදු 4කට පස්සේ අදත් ඔවුන් සර්බියාවට එරෙහිව පළවෙනි තරඟය ක්‍රීඩා කරමින් 2018 FIFA World Cup එකේ තමන්ගේ ගමන ආරම්භ කරනවා. මෙදාපාර බ්‍රසීලය, ස්විට්සර්ලන්තය සහ සර්බියාව තමයි මූලික වටයේදී කොස්ටරීකාවේ ප්‍රතිවාදීන් වෙන්නේ. අද වෙද්දි කොස්ටරීකාව ලෝක ශ්‍රේණිගතකිරීම්වලදී 23වන තැන පසුවෙනවා.

අද තරඟය ගැන කතා කෙරුවොතින්, කොස්ටරිකානු කණ්ඩායමේ ගෝලි විදියට ක්‍රීඩා කරන කෙයිලර් නවාස් ගේ කරපිට විශාල වගකීමක් තියෙන බව විශේෂයෙන්ම සඳහන් කරන්න ඕනේ. 2014 වසරේදීත් කොස්ටරීකාව ලබාගත්ත සුවිශේෂී සාර්ථකත්වයේ ප්‍රධානම පුරුකක් තමයි නවාස්ගේ සුවිශිෂ්ඨ ගෝල් රැකීම. බ්‍රසීලයේ පැවැති ලෝක කුසලාන තරඟාවලියේදී හොඳම ගෝල් කීපර්ට ලැබෙන සම්මානය සඳහාත් නවාස්ගේ නම යෝජනා වුනේ මේ දක්ෂතාවය නිසාමයි. ඒ කොහොම වෙතත් කොස්ටරීකාවේ පහුගිය අවසාන තරඟ කීපයේ දක්ෂතාවයන් නම් ඒ තරම් සුබදායී නැහැ. ඔවුන් අවසාන වශයෙන් ක්‍රීඩා කරපු තරඟ 5න් 3ක්ම පරාජයට පත්වීම ඔවුන්ගේ පැත්තෙන් තිබෙන ප්‍රධාන දුර්වලතාවයක්. 

කොස්ටරීකා ගෝලි නවාස් - 2014 FIFA World Cup එකේදි

සර්බියානු කණ්ඩායම ගැන කතාකෙරුවොතින්, 2010 වසරෙන් පසුව ඔවුන් පළවෙනි වතාවට තමයි FIFA World Cup තරඟාවලියකට සහභාගීවන්නේ. ඒ වගේම අවසානයේ පැවතුන තරඟ කීපයක්ම ජයග්‍රහණයකින් අවසන් කරන්නත් ඔවුන්ට හැකියාව ලැබුණා. ඒ වගේම  23 හැවිරිදි සර්බියානු ඉඳිරිපෙළ ක්‍රීඩක ඇලෙක්සැන්ඩර් මිට්‍රොවික් සර්බියාව ක්‍රීඩාකරපු අවසාන තරඟයේදී ගෝල් ත්‍රිත්වයක් ලබාගැනීමට සමත් වීමත් සර්බියාවේ ප්‍රභල ක්‍රීඩකයන් කීපදෙනෙක්ම මේ වෙද්දි ඉහළම ක්‍රීඩා රටාවක් පෙන්නුම්කරමින් සිටිමත් ඔවුන්ගේ පැත්තෙන් ඉතාම සුබදායී දෙයක් විදියට පෙන්වා දෙන්න පුළුවනි. විශේෂයෙන්ම මෙවර තරඟාවලිය රුසියාවේ පැවැත්වීම නිසාම තමන්ට හිතකර කාළගුණික තත්ත්වයන් යටතේ තරඟ කිරීමට ලැබීමත් සර්බියානුවන්ට තිබෙන අමතර වාසියක්.

හරි, දැන් තියෙන්නේ තරඟයේ ප්‍රතිඵලේ ගැන අපි දකින විදිය කියන එක.
අද තරඟය සර්බියානු ජයග්‍රහණයකින් කෙළවර වේවි කියන එකයි අපේ අදහස. බොහෝ විට 1-0 විදියට තරඟය අවසාන වේවි. ඒ වගේම තරඟය ජය පැරදුමෙන් තොරව අවසන් වෙන්නත් විශාල ඉඩක් තියෙනවා.

අපි ආයෙත් කොස්ටරීකාව දෙසට හැරෙමු. ඔවුන් අදත් මුහුණ දී සිටින්නේ 2014 තරඟාවලිය ආරම්භයේදී මුහුණපා සිටි තත්ත්වයටම කියලයි අපේ නම් අදහස. තමන්ගේ කාණ්ඩයේ සිටින බ්‍රසීලය සහ ස්විට්සර්ලන්තය කියන කණ්ඩායම් දෙක අතර තරඟ වලින් ඔවුන් ජය ලබාගැනීමේ සම්භාවිතාවය ඉතාම අඩු බව ඕනෑම කෙනෙක් පිළිගන්න කරුණක්. ඒ වගේම තමන්ට හිතකර සහ හුරුපුරුදු තත්ත්ව යටතේ සහ මේ වෙද්දි ඉතාම හොඳ පන්නරයකින් ක්‍රීඩා කරන සර්බියාවත් අද දවසේදී කොස්ටරිකාව අභිභවා යනු ඇතැයි කියලයි බොහෝ පාපන්දු විචාරකයන්ගේ අදහස. මේ නිසා ලෝකයේ බොහෝ පාපන්දු විචාරකයන්ට අනුව කොස්ටරිකාවේ ඉරණම මෙවරත් ලියවිලා තියෙන්නේ පළවෙනි වටයෙන්ම ගෙදර යන්න.

කොස්ටරිකාව ආයෙමත් තමන්ගේ ඉරණම තමන්ම ලියාගනීවිද? අපේ රටේ වෙලාවෙන් හරියටම හවස 5.30ට ඇරඹෙන තරඟයෙන් අපිට ඒ බව සජීවීව බලාගන්නට පුළුවනි.

Portugal VS Spain "අපි දැකපු හැටි" | The Review

Russia 2018 - අපි දැකපු විදිය

2018 FIFA World Cup එක පටන් ගත්තට පස්සේ තිබ්බ පළවෙනි "ලොකු" මැච් එක මේ වෙනකම් තිබ්බ හොඳම තරඟය බවට පත්කරන්න පෘතුගීසි සහ ස්පාඤ්ඤ කණ්ඩායම් දෙකට ඊයේ දවසේදී හැකියාව ලැබුණා. තරඟය පටන් ගත්ත වෙලාවේ ඉඳන් ඉවර වෙනකම් ආසන්න වශයෙන් විනාඩි 15කට සැරයක් දෙපැත්තෙන් එක පැත්තක් ගෝල් ගහපු මේ තරඟය මේ වෙනකම් තිබුණ තරඟය වලින් ක්‍රියාශීලීම තරඟය විදියටත් හඳුන්වන්න පුළුවනි. ඒ වගේම මේ වෙනතුරු පැවතුන තරඟ වලින් එක් තරඟයක් තුළදී වැඩිම ගෝල් සංඛ්‍යාවක් වාර්තා උනේත් මේ තරඟයේදීමයි. තරඟය තුළදී දෙපැත්තම රැස්කරගත්ත ගෝල් සංඛ්‍යාව 6ක්. ඒ වගේම සියළු විචාරක අනාවැකි බොරු කරමින් තරඟය අවසන් උනේ පෘතුගාලය සහ ස්පාඤ්ඤ කණ්ඩායම් දෙකම ගෝල 3 බැගින් සමව ලබාගෙන තරඟය ජය පරාජයෙන් තොරව අවසන් කරමින්.

පෘතුගාලය පැත්තෙන් ගත්තොතින් මේ තරඟය තනිකරම පෘතුගීසි නායක ක්‍රිස්ටියානෝ රොනාල්ඩෝ සහ ස්පාඤ්ඤ කණ්ඩායම අතර පැවතුන තරඟයක් විදියට හඳුන්වන්න පුළුවනි. පෘතුගීසි ගෝල් 3ම රොනාල්ඩෝගේ නම ඉඳිරියෙන් ලියවුනත් කණ්ඩායමේ අනිත් සාමාජිකයනුත් ඒ වෙනුවෙන් ඔහුට හොඳ සහයෝගයක් ලබා දුන්නා කියන එකයි අපේ අදහස. තරඟයේ 4වෙනි මිනිත්තුවේදී රොනාල්ඩෝගේ උපක්‍රමශීලීත්වයට පැරදුන ස්පාඤ්ඤ කණ්ඩායමේ නාචෝ නිසා පෙනල්ටියක් හරහා බොහොම පහසුවෙන් පළවෙනි ගෝලය ලබාගන්න රොනාල්ඩෝට හැකියාව ලැබුණා. 44වෙනි මිනිත්තුවේදී ස්පාඤ්ඤ ගෝලි ඩේවිඩ් ඩෙ ගේයා අතින් සිදුවුන අදහාගන්න බැරි අත්වැරැද්ද නිසා පෘතුගීසි ගෝල් ගණන 02ක් බවට පත්වුනත් තරඟය නරඹපු ෆුට්බෝල්වලට ආදරේ කරන හැම දෙනාගේම ගෞරවාදරයට පාත්‍ර වුනේ 88වෙනි මිනිත්තුවේදී ෆ්‍රී කික් එකකින් රොනාල්ඩෝ ලබාගත්ත ගෝල් එක. Spain defence wall එකට උඩින් ගිහින් ගෝල් එකේ දකුණු පැත්තේ කෙළවරින් හරියටම ගෝල් එක ඇතුළටම යන විදියට ගහපු ඒ ගෝල් එක මේ ලෝක කුසලානේ දැනට වාර්තා උන ගෝල්වලින් ලස්සනම ගෝල් එක කියලා අවිවාදයෙන් කියන්න පුළුවනි. කොටින්ම ස්පාඤ්ඤ ගෝලිට ඒ වෙලාවේදී කරන්න පුළුවන් උන එකම දේ කට ඇරගෙන ෆුට්බෝලේ ගෝල් එක ඇතුළට යන විදිය බලාගෙන ඉන්න එක විතරයි. ඒ ගෝල් එකත් එක්කම ස්පාඤ්ඤ අතේ තිබුණ ජයග්‍රහණය උදුරගෙන තරඟය සමව අවසන් කරගන්න රොනාල්ඩෝ ප්‍රධාන පෘතුගීසිකාරයන්ට හැකියාව ලැබුණා. තරඟයේදී පෙන්නුම් කරපු සුවිශිෂ්ඨ දක්ෂතාවයන් වෙනුවෙන්ම තරඟයේ වීරයා විදියට නම් කළේත් රොනාල්ඩෝවයි. 

ස්පාඤ්ඤ කණ්ඩායම පැත්තෙන් ගත්තම තරඟයේ වාසිය තමන්ගෙන් ගිලිහෙන හැම වෙලාවකදීම ආයෙත් ස්පාඤ්ඤ කණ්ඩායම තරඟයට ගේන්න ඩියාගෝ කොස්තා කටයුතු කළා. තරඟයේ 24වෙනි මිනිත්තුවේදී පෘතුගීසි ආරක්ෂකයන් හතර පස්දෙනෙක් තමන්ව වටකරගෙන ඉද්දි කොස්තා ලබාගත්ත ගෝල් එක ඊයේ තරඟයේදී ස්පාඤ්ඤ කණ්ඩායම ලබාගත්ත ගෝල්වලින් සුපිරි ගෝල් එකක් විදියට හඳුන්වන්න පුළුවනි. ඒ වගේම ආයෙත් පෘතුගාලය තරඟයේ ඉඳිරියෙන් සිටිද්දි 55වෙනි මිනිත්තුවේදී කොස්තා ලබාගත්ත ගෝලයත් එක්ක තරඟය සමකරගන්න ස්පාඤ්ඤයට අවස්ථාව උදා වෙනවා. හරියටම ඊට මිනිත්තු 3කට පස්සේ නාචෝ ගේ කකුලෙන් ඉගිල්ලුන ෆුට්බෝලේ පෘතුගීසි ගෝල්කණුව ඇතුළට කඩාවදින්නේ තරඟ ජයග්‍රහණය ගැන පෘතුගීසි බලාපොරොත්තු කඩකරමින්. නාචෝ ගේ ඒ ගෝල් එකත් බොහොම හැඩකාර ගෝල් එකක් කියන එක තමයි අපේ අදහස. එතන ඉඳලා මිනිත්තු 30ක කාලයක් ජයග්‍රහණය අතේ තියාගෙන ස්පාඤ්ඤ කණ්ඩායම ක්‍රීඩා කෙරුවත්, 88වෙනි මිනිත්තුවේදී රොනාල්ඩෝගේ ෆ්‍රී කික් එකෙන් ඉගිලුන ෆුට්බෝලේ ගෝල් එකක් විදියට සටහන් වෙද්දි තරඟය ජය පරාජයෙන් තොරව අවසන් වීම සහ තරඟයේ වැඩි ගෞරවය පෘතුගාලයට හිමිවීමත් සිදුවුනා.

 

අවසාන ප්‍රතිඵලය ජය පරාජයෙන් තොර වුනාට තරඟයේ වැඩි පාලනයක් තිබුණේ ස්පාඤ්ඤ කණ්ඩායම අතේයි. පාපන්දුව තමන්ගේ ග්‍රහණයේ තබා ගැනීම, නිවැරදි විදියට පාපන්දුව හුවමාරු කරගැනීම වගේ දේවල්වලදි ස්පාඤ්ඤ කණ්ඩායම පෘතුගාලයට වඩා ගව් ගණනාවක් ඉඳිරියෙන් ඉන්න විදිය පැහැදිලිව දැකගන්න පුළුවන් වුනා. තාක්ෂණික වශයෙන් ස්පාඤ්ඤ කණ්ඩායම මේ දක්වන දක්ෂතාවය සහ ජවය ඉඳිරියේ පැවැත්වෙන ඉරාන් සහ මොරොක්කෝ තරඟ දෙකේදී ඔවුන්ට ජයග්‍රහණ ලබා දෙන්න තරම් ප්‍රමාණවත් වේවි කියන එකයි අපේ අදහස. ඒ වගේම පෘතුගාල කණ්ඩායමත් පාපන්දුව හුවමාරු කරගැනීමේදී තමන් දක්වපු දුර්වලතාවයන් මඟහැර ගැනීම ලෝක කුසලානයේ ඉඳිරි තරඟ සඳහා ඉතා හොඳ ආයෝජනයක් බව ස්ථීරයි.

හැකියාවෙන්, ජවයෙන්, ක්‍රියාශීලීත්වයෙන් සහ ගෝල්වලින් පිරුණ මිනිත්තු 90ක ෆුට්බෝල් තරඟයක් අපි දැකපු විදිය ගැන තමයි මේ ඉඳිරිපත් කෙරුවේ. 2018 FIFA World Cup එකේ ඉඳිරි තරඟත් මේ ආකාරයේම උණුසුම් තරඟ වෙනවාට කිසිම සැකයක් නැහැ. ඒ තරඟවල Preview සහ Review ඔස්සේ යළිත් හමුවෙමු.

Portugal VS Spain | Preview

Russia 2018 - අපි දකින විදිය

 

Portugal VS Spain | Preview

2018 FIFA World Cup එකේ පළවෙනි "ලොකු" මැච් එක පෘතුගාලය සහ ස්පාඤ්ඤය අතර අද අපේ රටේ වෙලාවෙන් රෑ 11.30ට ආරම්භ වෙනවා. ෆුට්බෝල් ලෝකේ දැවැන්තයෝ දෙන්නෙක් අතර සිදුවෙන මේ සටන බලන්න ආස හිතෙන උණුසුම් තරඟයක් වේවි කියන එක තමයි අපේ අදහස.

FIFA ලෝක කුසලානයට පමණක් දෙවෙනි වෙන UEFA European Championship එකේ වර්ථමාන ශූරයෝ තමයි පෘතුගාලය. අද වෙද්දි ලෝක ශ්‍රේණිගත කිරීම්වල ඔවුන් ඉන්නේ 4වෙනි තැන. ඒ වගේම මෙවර ලෝක කුසලානය දිනාගත හැකි බවට විශ්වාස කරන කණ්ඩායම් අතරේ ඉහළින්ම කියවෙන නමක් තමයි පෘතුගාලය. මේ නිසා අද තරඟය ජය අරගෙන බොහොම ශක්තිමත් විදියට තමන්ගේ ලෝක කුසලාන ගමනේ ආරම්භය ලබාගන්න ක්‍රිස්ටියානෝ රොනාල්ඩෝ ප්‍රමුඛ පෘතුගීසිකාරයොන්ගේ අරමුණු කරගෙන ඇති. 2016දී යුරෝපීය කුසලාන අවසාන මහා තරඟයේ ක්‍රීඩා කරපු 11 දෙනාගෙන් 9 දෙනෙක්ම මෙවර ලෝක කුසලානය සඳහාත් නම් කර තිබීමෙන්ම පෘතුගාලයේ ශක්තිය පිළිබඳ අවබෝධයක් ලබාගන්න පුළුවනි. සමස්ථයක් විදියට ගත්තම 2016 යුරෝපීය කුසලානයේ ක්‍රීඩාකරපු පෘතුගීසි ක්‍රීඩකයන් 13දෙනෙක් මෙවර ලෝක කුසලාන සංචිතයට ඇතුළත්ව ඉන්නවා. ක්‍රිස්ටියානෝ රොනාල්ඩෝ, පෙපේ, බර්නාඩෝ සිල්වා, ජොආවෝ මූටීනියෝ වගේ ඉඳිරිපෙල සහ මැදපෙළ සුපිරි ක්‍රීඩකයෝ එක්ක රුයි ප්‍රැටීශියෝගේ සුපිරි දැල් රැකීම එකතු උනාම පෘතුගීසි කණ්ඩායම නවත්තන්න බොහොම අමාරු වේවි කියන එකයි අපේ අදහස.

අනිත් පැත්තෙන් ලෝක ශ්‍රේණිගත කිරීම්වල 10වෙනි තැන ඉන්න ස්පාඤ්ඤ කණ්ඩායමත් බොහොම ශක්තිමත් කණ්ඩායමක්. සරළවම කියනවානම්, ස්පාඤ්ඤ කණ්ඩායම මෙදාපාර රුසියාවට ගොඩ බහිද්දිම බොහෝ දෙනෙක් ඔවුන්ව නම් කරලා තිබ්බේ මෙවර FIFA ලෝක කුසලානය දිනාගන්නා කණ්ඩායමක් විදියට. ස්පාඤ්ඤ කණ්ඩායම අන්තිමට තරඟ කරපු තරඟ 20න් එකක්වත් ඔවුන් පැරදිලා නැහැ. ඒ තරඟ වලින් තරඟ 14ක් ජයගත්ත ඔවුන් අනිත් තරඟ 6 ජය පරාජයෙන් තොරව අවසන් කරගන්න සමත් වෙලා තියෙනවා. නමුත් FIFA ලෝක කුසලානය පටන් ගන්නේ හෙටයි කියලා ස්පාඤ්ඤ පාපන්දු බලධාරීන් ඔවුන්ගේ ප්‍රධාන පුහුණුකරු ජූලෙන් ලෝපෙටේගුයිව ධූරයෙන් පහ කරන්නේ මෙම ලෝක කුසලානයෙන් පසු ඔහු රියල් මැඩ්‍රිඩ් කණ්ඩායමේ ප්‍රධාන පුහුණුකාර ධූරය ලබාගන්නා බවට සිදුවූ නිවේදනයත් එක්ක. මේ නිසා හිස් වෙච්ච ප්‍රධාන පුහුණුකාර තනතුරට තවත් පාපන්දු ප්‍රවීණයෙක් වෙන ෆර්නෑන්ඩෝ හියේරෝ ව පත්කිරීමට ස්පාඤ්ඤ පාපන්දු බලධාරීන් කටයුතු කෙරුවා. ලෝක කුසලානය කට උඩ තියාගෙන සිදුකරපු මේ ඉවත් කිරීම් සහ පත්කිරීම් කණ්ඩායමේ මානසිකත්වයට බොහොම නරක විදියට බලපාවි කියන එක තමයි බොහෝ විචාරකයන්ගේ අදහස. ඒ කොහොම වෙතත් අන්ද්‍රෙස් ඉනිඒස්ටා, සර්ජියෝ රාමෝස්, සියාගෝ කොස්තා වගේ සුපිරි ක්‍රීඩකයින් සහ දැනට ලෝකයේ හොඳම ගෝල්කීපර් විදියට පිළිගන්න ඩේවිඩ් ඩෙ ගේයා ගෙන් සමන්විත ස්පාඤ්ඤ කණ්ඩායම 2010දී තමන් අත්කරගත්ත සාර්ථකත්වය මෙවරත් අත්කර ගන්න ඉඩක් තියේවි කියන එක තමයි බොහෝ දෙනාගේ අදහස.

හරි, මූලික විස්තර එතනින් ඉවරයි. දැන් අනාවැකි කියන වෙලාව.

කණ්ඩායම් දෙකම එක හා සමාන දක්ෂතාවයන්ගෙන් සහ අත්දැකීම්වලින් සමන්විත නිසා බොහොම තියුණු තරඟයක් තියේවි. 1-0 හෝ 2-1ක් විදියට පෘතුගීසි ජයග්‍රහණයකින් තරඟය අවසන් වේවි කියලා අපි විශ්වාස කරනවා.

නායකයො තුනයි හෙට වාසනාවන්තයා?

අපි පසුගිය දා එක්සත් අරාබි එමීර් රාජ්‍යයට පමණක් උඩින් හිටපු ආසියානු කුසලාන ක්‍රිකට් තරගාවලියේ කන්ඩායමකක් විදියට දැඩි පසුබෑමක් තිබුනා.. පුද්ගලික මට්ටමින් යම් යම් අය සාර්ථක වුනත් සමස්ත කන්ඩායම ගත්තාම ආසියානු කුසලානයට පවා අභියෝගකල හැකි මට්ටමක ලංකා කන්ඩායම ඉන්නවාය කියල පෙනුනෙ නෑ. 

කන්ඩායමක් විදියට බංගලාදේශ ටීම් එක අපිට වඩා බොහොම ඉදිරියෙන් සිටියා.. ඔවුන් සතුව ටී ටුවෙන්ටි මැච් වලට අවශ්‍ය  රිද්මය පිතිකරුවන් තුල තිබුනා..ඕවර 15ට ලකුනු 140ක ඉලක්කයක් ඉන්දියාවට දෙන්න හැකිවෙන්නෙ ආන්න ඒ නිසා.. ඒ වගේම කන්ඩායමක් විදියට ඔවුන් ලග ඉන්දියාව එරෙහි විශේෂ සැලසුම් ආදිය තිබුනා.. ක්‍රීඩකයින් පන්දුවට පහර දෙනවිට වගේම බෝල දානකොටත් ඒ සැලසුම් ආදිය මනාව විදහා දැක්වුනා.. 

අපි ටීවි එකෙන් මැච් එක බලනකොට අපිට පේන්නෙ එක්කෙනෙක් ඇවිත් බෝලෙ දානවා ඉන්පස්සෙ ගහනවා ගහන එකට ලකුනු වැටෙනවා ආදී භෞතික දේවල්ටිකක් විතරයි.. ඒත් ක්‍රිකට් අද දියුනු වෙලා තියෙන තත්වෙ එක්ක දක්ෂ ක්‍රීඩකයින් 11ක් එකතුවෙලා මැච් එකකට බැහැලා මැච් එක ගොඩදාන්න අමාරුයි.. ප්‍රතිවාදින් අද්‍යයනය කිරීම සහ ප්‍රතිවාදීන්ට සැලසුම් සහගත විදියට ඇටෑක් කිරීම වැදගත්. 

ලංකාවෙ මාලිංග මැතිව්ස් සහ  චන්දිමාල් කියනතුන්දෙනා අතර නායකත්වය ගැන අර්බුධයක් තියෙනවා.. ඇතුලෙන් වගේම පිටිනුත් පේන්නම තියෙන විදියට ඒක ඒතරං හොද දෙයක් නෙමෙයි.. දක්ෂතා තියෙන කන්ඩායමක් අපිට සිටියත් අනික් ටීම් එකට සාර්ථක අභියෝගයක් වෙන්නනම් කන්ඩායම එකතු වෙලා සැලසුම ්සහගත ගමනක් යන්නට ඕනි.. අවසානෙ අපි පාකිස්ථානයට පරදින අවස්ථාවේදි  පන්දු යවන්නන් 7ක් විතර පාවිච්චි කලා.. ඒ අවස්ථාවෙදි ලංකා නායකයා සතුව තමුන්ගේ පංදු යැවීමේ ඇණියේ හැකියාවන් ගැන ලොකු දැක්මක් තිබුන බවක් පෙනුනෙ නෑ.. 

බංගලි ටීම් එක ලංකාවෙ හතුරුසිංහ කල්පගේ ල ලොකු තැනකට ගෙඩදාල තියෙන වගක් පේනවා..අපිටත් ඒ වගේ දිග දැක්මක් සහිත ලොකු හස්තයක අවශ්‍යතාවයක් තියෙනවා.. ඒ වගේම ක්‍රීඩකයින් විදියට කොච්චර වටිනවා වුනත් ඇතැම් හිතුවක්කාර මතධාරින්ගේ හිතුවක්කාර මත වලින් ක්‍රීඩා කන්ඩායම ආරක්ෂා කරගන්න එකත් අපේ පරිපාලකයින්ගේ වගකීමක් වෙනවා.. 

ක්‍රිකට් කන්ඩායමක ජයග්‍රහනයක් කියන්නෙ අපිට පේන දේවල් ටිකම විතරක් නෙමෙයි.. ඒකට ක්‍රිකට් පරිපාලකයින් සහ තේරිම් කමිටු පුහුනු කරුවන් භෞත චිකිත්සකයින් ආදී බොහෝ කන්ඩායම් එකට එකතු වන්නට ඕනි.. එතකොට තමයි අපි හෙවත් ප්‍රේක්ෂකයින්ට පේන්න කන්ඩායම් වලට කුසලාන උස්සනවා අපිට බලාගන්න හැකියාවක් ලැබෙන්නෙ. 

මම දකින විදියට අපිට මේ පාර ටුවෙන්ටි ලෝක කුසලානය බොහෝම ඈතයි... ඔස්ට්‍රේලියාව නවසීලන්තය දකුනු අප්‍රිකාව ඉන්දියාව බංගලිදේශය පවා කන්ඩායම් විදියට මෑත කාලයේ අපිට වඩා ස්ථාවර අඩියක් දෙකක් ඉස්සරහින් ඉන්නවාය කියලා පේනවා.. 

ඉදලා හිටලා මැච් එකක් දෙකක් දින්නට අපිට හැමදාම සැලසුම් නැතුව දුවන්න අමාරුයි.. කන්ඩායම නව රාමුවකට ගන්න කස්ටිය මැදිහත් වුනේ නැතිවුනොත් හැමෝටම ඒකෙ වේදනාව විදගන්න අවස්ථාවක් ලැබේවි.. ලංකාව විදියට අපි ලෝකෙ බොහෝ දෙනා අදුනන්නෙ සුපිරි ක්‍රිකට් ක්‍රීඩකයින් සහ ක්‍රිකට් ක්‍රීඩාවක් හිමි පුංචි සුන්දර රටක් විදියට.. ඒ නම දිගටම අරං යන්න ක්‍රීඩකයින් පාලකයින් තමුන්ගේ මත පෝඩ්ඩක් පැත්තක දාල කන්ඩායමක් වෙනුවෙන් එකතුවෙනෝ නම් හොදයිකියලා මට හිතෙනවා.. 

ආසියාවෙන් ඈතට විසිවෙන ලංකා ක්‍රිකට්

දකුණු ආසියාවෙ ජනප්‍රියම ක්‍රීඩාව ක්‍රිකට්..ලෝක ජනගහනයෙන් සියයට විසිපහක්ම ඒ කීවෙ හතරෙන් එකක්ම ඉන්නෙ දකුණු ආසියාවෙ. 

1947ට කලිං ආසියානු කුසලානය කියලා එකක් තිබුනා නම් ඒකෙදි සෙල්ලං කරන්න වෙන්නෙ බොහෝවිට ලංකාවටයි ඉන්දියාවටයි විතරයි.. 1947දි පාකිස්ථානය සහ ඉන්දියාව කියල රටවල් දෙකකට මහා හින්දුස්ථානය බෙදිලා යනවා ඒකෙනුත් නැගෙනහිර පාකිස්ථානය කියලා හදුන්වාගත්ත බංගලි පලාත 1970 දශකයේදී පාකිස්ථානයෙන් බෙදිලා බංගලිදේශය කියලා වෙන් වෙනවා.. 

මේ විදියට දකුනු ආසියාවේ රටවල් අතර තියෙන ජනප්‍රියම කුසලානයක් තමයි ආසියානු කුසලානය කියන්නෙ. 

මේ පාර මේ කුසලානය පැවැත්වෙන්නෙ බංගලිදේශයේ.. බංගලිදේශයේ එකම එක ක්‍රීඩාංගනයක තමයි බොහෝමයක් තරග පැවැත්වෙන්නෙ. මීලගට තියෙන ක්‍රිකට් ලෝකයේ විශාලතම අවස්ථාව තමයි ලෝක කුසලානය.. 20-20 තරග රටාවේ ලෝක කුසලානය තව ටික කාලෙකින් ඉන්දියාවෙදි පටන් ගන්නවා.. 

ලංකා ටීම් එක ඉන්දියාව එක්ක තිබුන තරග තුනෙන් 1වෙනි තරගය නොසිතූ විරු අන්දමින් ලංකාව දිනනවා.. ඉන්දියානු කන්ඩායමේ අවතක්සේරු කිරීම සහ අලුත්ම පිරිසක් තරග බිමට ආවම ඉන්දියාවට තියෙන අපහසුවත් එක්ක ක්‍රීඩාංගනයේ තත්වයත් එම දැවැන්ත ඉන්දීය පරාජයට හේතු වාසනා වෙන්නට ඇත. ඉන් අනතුරු පැවති තරග 4ම ලංකාව ඇඹරුනා.. කොටින්ම ඩුබායි රට එක්ක තිබුන තරගෙදිත් ලංකාව ලේසියෙන් ගැහුව බවක් පෙනුනෙ නෑ.. 

බංගලිදේශ කන්ඩායම ඊයේ හැන්දෑවෙ ලංකාවෙ සිංහයෝ විනාස කලා.. බෙංගාලි කොටි තමයි බංගලි දේශයේ ලකුණ. කොටි ටික සිංහයන්ට නෙලුව නෙලිල්ලක් එපා වෙන්නම.. 

ලංකාවට තියෙන ආදරේ පැත්තකින් තියලා බැලුවම අපේ ටීම් එක ලොකු තැනක ඉන්නාවය කියල කියන්න අමාරුයි..මාලිංග රංගන හේරත්.. වගේ අවසාන කාලේ ඉන්න බෝලර් ලා දෙන්නෙකුයි ඩිල්ශාන් මැතිව්ස් වගේ දැවැන්ත පිතිකරුවන් තුන්දෙනකුයි විතරයි ලංකා කන්ඩායමෙන් පෙන්නුම් කරන්නෙ. ඊට අමතරව ලොකු බලයක් තියෙන වගක් නම් පේන්න නෑ.. 

මම හිතන්නෙ ඊලග තරග දෙකම පැරදිලා අපි හිස් අතින් ගෙදර ඒවි.. මීට කලකට පෙර ඉදන් ආසියානු කුසලානයට ලෝක කුසලානයට ලැස්ති වෙන්න අපිට කාලය තිබුනා.. නමුත් ඒකට කන්ඩායමක් විසේශයෙන් පුරුදු පුහුනු කලාද කියලා ගැටලුවක් තියෙනවා.. 

චන්දික හතුරුසිහ යටතේ බංගලි ටිම් එක ගොඩක් දුර ඇවිත්.. බංගලි කන්ඩායම වෙනස් කරන්න හතුරුසිිංහට හැකිවෙන්නට ඇති. ලාංකිකයින් වශයෙන් ආඩම්බරයි.. ඊඨ අමතරව ගතතොත් හතුරුසිංහ පුහුනු කරුවෙක් විතරයි.. එයැයි ඇවිත් සෙල්ලම් කරන්නෙ නෑනෙ.. බංගලි දේශ රටේ ක්‍රීඩකයින් සතුව තියෙන ක්‍රීඩා ජවය විශිෂ්ඨයි.. ඔවුන් නායකයා එක් කෙනෙක් කරගෙන අනික් අය බලාගෙන හිටියෙ නෑ.. හැමෝම එකතුවෙලා සෙල්ලම් කල විදියක් තමයි  පෙනුනෙ.. 

ලංකාව දිනන වෙලාවට හොද කියන්න පුලුවනි.. ඒ වගේම පරදිනකොට වැරදි කියන්න ත් පුලුවනි..හැමදේකටම ක්‍රිකට් පාලක මණ්ඩලයට වග කියන්න අමාරුයි.. නමුත් ඇහැට පේන්න තියෙන සමහරක් වැරදි අපේ කන්ඩායම අතින් නැවත නැවත කිසිම කැතක් නැතුව සිද්ද වෙනවා.. ඒ ටික හරි නිවැරදි කරගන්න හැකියාවක් අපේ කන්ඩායමට ලැබේවා කියල අපි පාර්ථනා කරමු.. 

ඊයේ අපිට මොකද උනේ | Our Chances in CWC 2015

2015 ලෝක කුසලානයේ ශ්‍රී ලංකාව සහ ඕස්ට්‍රේලියාව අතර තරඟය ඊයේ අවසාන ඉවර උනේ ඕස්ට්‍රේලියාවට ලකුණු 64ක ජයග්‍රහණයක් ලබාදෙමින්.

ගොඩක් අය කියන්නේ ඕස්ට්‍රේලියාවට අපේ ටීම් එක ගහපු ගැහිල්ල හරි හොඳයි කියලයි. ඒ වගේම ඒ පරාජය ජයග්‍රාහී පරාජයක් විදියටත් බොහෝ දෙනා අර්ථ දක්වලා තිබුණා. සංගක්කාරගේ ශතකය, ඩිල්ෂාන් එක ඕවරයකදී 4 පාරවල් 6ක් ගැසීම, චන්දිමාල්ගේ පන්දු 22 අර්ධ ශතකය වගේ දේවල් එ තරඟයේදී අපි දැක්ක හොඳ දේවල් තමයි. නමුත් ඒ මැච් එකේදි අපි හරියට සෙල්ලම් කළාද? ඇත්තටම ඒක ජයග්‍රාහී පරාජයක්ද? එහෙමත් නැතිනම් අනිවාර්යෙන්ම වෙන්න තිබ්බ පරාජයක්ද?

මීට කළිං මැච් එකේ එංගලන්තෙත් එක්ක දින්නට පස්සේ ලිව්ව සටහනේදීත් ශ්‍රී ලංකා කණ්ඩායමේ තියෙන ප්‍රශ්න ගැන අපි කතා කළා. ඒ ප්‍රශ්න ඔක්කෝම ඒ විදියටම මේ තරඟයේදීත් තිබ්බ එක තමයි අවාසනාවට කාරණාව.

මුලින්ම සළකමු පන්දු යැවීම...

එංගලන්ත තරඟයේදී අන්තිම ඕවර 10 දී ලකුණු 103ක් ලබා දුන්නා. ඊයේ තරඟයේදී අන්තිම ඕවර 10 දී ඕස්ට්‍රේලියාව ලබාගත්ත ලකුණු ගාණ 123ක්. ඒක එංගලන්තය ලබාගත්තට වඩා ලකුණු 20ක වැඩිවීමක්. අන්තිම ඕවර 15ම බැලුවොත් ඕස්ට්‍රේලියාව ලකුණු 175ක් ගැහුවා. බැටිං පවර්ප්ලේ ඕවර් 5දී ඕස්ට්‍රේලියාව ගත්ත ලකුණු ගාණ ලකුණු 54ක්. ඒ වගේම අන්තිම ඕවර 10දී ඕවරයකට ලකුණු 12.3ක වේගයක් රඳවාගන්න ඕස්ට්‍රේලියානු පිතිකරුවන්ට අපේ පන්දු යවනන් ඉඩ ප්‍රස්ථාව දීලා තියෙනවා.

ඊයේ අවසාන ඕවර 10යේදී අපේ පන්දු යැවීම සිදු වුනේ මේ ආකාරයටයි.

ප්‍රසන්න ඕවර් 2 (41,46)  ලකුණු 33 (RPO 16.5)
මැතිව්ස් ඕවර් 3 (42,44,50) ලකුණු 33 (RPO 11.0)
තිසර    ඕවර් 3 (43,47,49) ලකුණු 47 (RPO 15.6)
මාලිංග  ඕවර් 2 (45,48) ලකුණු 10 (RPO 5.0)

එංගලන්ත තරඟයට සාපේක්ෂව ඉතා හොඳ පන්දුයැවීමක් ලසිත් මාලිංගගෙන් දක්නට ලැබුණත්, මැතිව්ස් සහ තිසර දෙදෙනාම ආයෙත් වතාවක් දැඩි ප්‍රහාරයකට ලක්වුනා. ප්‍රසන්න තමන්ගේ ඕවර 10දී ලබා දුන් ලකුණු 77න් 33ක්ම ලබාදුන්නේ මේ අවසාන ඕවර 2දී වීමත් විශේෂත්වයක්. ඒ කියන්නේ දැන් ගැටළුව පැහැදිලියි. අන්තිම ඕවර 10යේ පන්දු යැවීම සඳහා තිසර සහ මැතිව්ස් සුදුසු නැහැ. සචිත්‍ර, ඩිල්ෂාන් දෙනම ඉද්දි දිගින් දිගටම තිසරවම බෝල් කරන්න දාන්න මැතිව්ස්ට හිතුනේ ඇයි කියන එක ගැන කිසිම අදහසක් මට නැහැ. ඒත් දැං වෙච්ච දේවල් වෙලා ඉවරයි. ඉඳිරි තරඟවලදී ඒ වෙනුවට වෙන යම් විකල්පයකට යා යුතුයි. මාලිංග මීට වඩා වැඩි ඕවර සංඛ්‍යාවක් අවසාන ඕවර 10 තුළදී යැවිය යුතුයි. ඒ වගේම ඩිල්ෂාන් සහ සචිත්‍ර දෙදෙනාව මීට වඩා භාවිතා කරන්නට තිබුණා. තමන්ට ඉන්න හොඳම පන්දු යවන්නන්ව ඉතුරු කරගෙන අනිත් අයගෙන් මැද ඕවර් 25,30 කවර් කරගන්න එක නායකයාගේ වැඩක්. කෙසේවෙතත් අවසාන ඕවර 10දී ලකුණු 100කට වඩා අපේ පන්දු යවන්නන් ලබාදෙන මේ ක්‍රියාවලිය වෙනස් විය යුතුමයි. එහෙම නැති උනොත් ඉස්සරහටත් ලකුණු 350ක් 360ක් පස්සෙන් පන්නන්න තමයි වෙන්නේ.

පන්දු රැකීමත් ඒ ආකාරමයි. ඊයේ දවසේදී අතෑරපු උඩපන්දු ගණන 4ක්. ඒ වගේම හතරේ සීමාව ආසන්නයේ පන්දු රැකීමත් සාපේක්ෂව මදි. ඊයේ ඕස්ට්‍රේලියානු ක්‍රීඩකයින් 4 සීමාව ආසන්නයේදී පන්දුව රැකීමෙන් අපිට වඩා බොහොම ඉහළින් හිටියා. මගේ පුද්ගලික විශ්වාසය, ඊයේ දවසේදී පන්දු රැකීම ඉහළ තලයක තිබ්බනං අපිට ඕස්ට්‍රේලියාව ලබාගත්ත ලකුණු ගණන 350ට අඩු කරගන්න තිබුණා. නමුත් ඒක එහෙම උනේ නැහැ. අපේ කණ්ඩායමේ පන්දු රැකීමේ මේ දුර්වලතාවය ලෝක කුසලානය පුරාම අපි දැක්ක දෙයක්. ඒක කවදා හැදෙයිද කියන්න දන්නේ නැහැ.

පන්දුවට පහරදීමත් එහෙම්මම තමයි.
හැමදාම වගේ බැට් කරන්න ආපු ගමං තිරිමාන්න දෙන කැච් එක මිස් නොකර අල්ලගන්න ඕස්ට්‍රේලියාවට පුළුවං උනා. ඊයේ මැච් එකට බැට්ස්මන්ලා 9ක් ගැහුවට ඒකෙන් සාර්ථක උනේ තුන්දෙනෙක් විතරයි. ඒ ඩිල්ෂාන්, සංගක්කාර සහ චන්දිමාල්. මේකෙන් වඩාත් වැදගත් වෙන්නේ චන්දිමාල්ගේ සාර්ථකත්වය. ඊයේ වෙනකං කිසි කෙනෙක් විශ්වාස කළේ නැහැ චන්දිමාල්ට ඔය තරම් හැකියාවක් තියෙනවා කියලා වේගයෙන් ලකුණු රැස්කරන්න. නමුත් අධික පීඩනයක් යටතේ උනත් චන්දිමාල් ඉතාම දක්ෂ විදියට පහරදීලා ඉතා ඉක්මන් ලකුණු 50ක් කණ්ඩායමට ලබා දුන්නා. ඒ දායකත්වය අතිශය තීරණාත්මකයි. නමුත් සමස්ථයක් විදියට අනිත් පිතිකරුවන් හැමෝම ෆේල්. ඒ බව අපි පිළිගත යුතුයි. උඩ තුන් හතරදෙනා ගැහුවේ නැත්තං ලකුණු ගහන්න වෙන කෙනෙක් නැහැ කියන දේ ආයෙත් වතාවක් පැහැදිලි උනා. ඊයේ මැච් එකේදී චන්දිමාල් පාදයේ ආභාදයක් ඇවිත් පැවිලියන් එකට යන්නේ ලකුණු 281දී. එතකොට ඕවර් ගණන දැක්වුනේ 41.2ක් විදියට. එතන ඉඳලා ඕවර් 5ක් යද්දි ලකුණු 30ක් විතරක් එකතුවෙද්දි අපි ඕල්අවුට් වෙනවා. මේක ලොකු ප්‍රශ්නයක්. අපේ මැද පෙළ දුර්වලයි කියන දේ දෙවෙනි වතාවටත් ඔප්පු උනා. ඒ වගේම හරි හමං බෝලිං ඇටෑක් එකක් දෙන්න පුළුවං ටීම් දෙකක්ම දැං අපිව ඕවර් 50ට කලිං ඕල්අවුට් කරන්න පුළුවං කියලා ක්‍රියාවෙන්ම ඔප්පු කරලා පෙන්නලා තියෙනවා. ඉස්සෙල්ලාම නවසීලන්තේ අපිව ඕවර් 47කදී ඕල්අවුට් කළා. ඊයේ ඕස්ට්‍රේලියාවත් අපිව ඕවර් 47කදී ඕල්අවුට් කළා. අඩුම ගානේ ඕවර් 50 බැට් කරගන්නවත් අපිට බෑ නේද කියන සිතුවිල්ල ස්ථිර කරන එක යහපත් දෙයක් නෙමේ. ලෝක කුසලානේ ඉස්සරහට යන්න අවශ්‍ය නම් මේ දේවල් ඉතා ඉක්මනින්ම වෙනස් කරගත යුතුයි.

අපිට තියෙන ඊළඟ මැච් එක තියෙන්නේ ස්කොට්ලන්තේ එක්ක. ඒ මැච් එක දිනාගන්න අපේ අයට හැකියාව තියෙනවා. ඒක දින්නත් අපි නතර වෙන්නේ A3 කියන ස්ලොට් එකේ. මේ යන විදියට B2 කියන ස්ලොට් එකේ ඉතුරු වෙන්නේ දකුණු අප්‍රිකාව. එතකොට අර්ධ අවසන් පූර්ව තරඟය (Quarter Final) තියෙන්නේ අපි සහ දකුණු අප්‍රිකාව අතර. ඒ මැච් එකේදීත් මේ විදියට බෝල් කළොත් ඊයේ මැක්ස්වෙල් බෝල 50කදී ලකුණු 100ක් ගැහුවා වගේ එදාට ඩිව්ලියර්ස් බෝල 80කට 180ක්වත් ගහයි. කොහොමත් දකුණු අප්‍රිකාව එක්ක මැච් එකේදී එයාලා මුලින් බැට් කළොත් ලකුණු 370ක් 380ක් විතර එළවන්න බලාපොරොත්තුවෙන් ඉන්න එක හොඳයි. මේ බෝල් කරන විදිය සහ ෆීල්ඩ් කරන විදිය දැක්කම ඊට වඩා යහපත් චිත්‍රයක් මවාගන්න බැහැ. ඒ වගේම බැටිනුත් මේ විදියටම තිබ්බොත් ලකුණු 330ක් විතර ගහගන්න අපේ අයටත් පුළුවං වේවි. ලකුණු 40කින් විතර මැච් එක පැරදුනාම ඊට පහුවෙනිදට ක්‍රිකට් විචාරක බුවාලා හැමෝම වගේ ඒකත් "ජයග්‍රාහී පරාජයක්" විදියට අර්ථ දක්වාවි. පත්තරවලත් එහෙම්මම තියේවි. ලෝක කුසලානේ වෙන ටීම් එකක් ද්නාගන්නවා අපිට කට ඇරගෙන බලගන්න නං හැකියාව තියේවි.

අපි සහ දකුණු අප්‍රිකාව අතර අර්ධ අවසන් පූර්ව තරඟය තියෙන්න නියමිත වෙන්නේ සිඩ්නි ක්‍රීඩාංගනයේදීමයි. ඒ කියන්නේ ඊයේ දවසේ මැච් එක තිබ්බ පිට්ටනියේමයි. ලෝක කුසලාන ඉතිහාසය ගත්තෝතින් දකුණු අප්‍රිකාව කියන්නේ ඉතාම අවාසනාවන්ත රටක්. හැම ලෝක කුසලානෙකටම කළිං රෑන්ක් 01 ඉන්න කණ්ඩායම තමයි දකුණු අප්‍රිකාව. ඒ වගේම පළවෙනි රවුමත් හොඳින්ම ඉවර කරන කණ්ඩායමක් තමයි ඔවුන්. හැබැයි ඔවුන්ගේ වාසනාව හැමදාම ක්වාටර් ෆ්යිඅල්, සෙමි ෆයිනල් එද්දි ඉවර වෙනවා. බොහොම අවාසනාවන්ත විදියට ෆයිනල් පෙනි පෙනී ඔවුන් තරඟාවලියෙන් ඉවතට විසිවෙච්ච අවස්ථා ගණන එකක් දෙකක් නෙමේ. අනිත් අතිං අපේ ශ්‍රී ලංකා කණ්ඩායම ගත්තම ෆයිනල් එන්න තියෙන වාසනා ශක්තිය නං අති විශාලයි. 2003 ඉඳංම ලෝකේ හැම කලාපෙකම තිබ්බ ලෝක කුසලානවලදී අන්තිම කණ්ඩායම් 4ට එන්න අපිට පුළුවං උනා. වාසනාව කියන සාධකේ අතිං අපි දකුණු අප්‍රිකාවට වඩා ඉඳිරියෙන් ඉන්නවා. හැබැයි මෙදාපාරත් ඒ වාසනාව අපිට තියෙයිද?

මේ ගැටළු ඔක්කෝටම උත්තර දැක බලාගන්න පුළුවනි ලබන මාර්තු 18 වෙනිදට. ඒ වෙද්දි දැං මේ තියෙන දුර්වලතාවයන් හදාගෙන වඩාත් ශක්තිමත්ව ක්‍රීඩා කරන්න අපේ කණ්ඩායමට ශක්තිය, ධෛර්යය සහ හැකියාව ලැබේවා කියලා ප්‍රාර්ථනා කරනවා. මෙහේ ඉඳං ක්‍රීඩාලෝලීන් විදියට අපිට කරන්න පුළුවං එකම දේ ඒක විතරයි!!!

එංගලන්තේ හමුවේ ලැබූ ජය මහා විශාලද? | DO NOT PANIC, We are far behind.

2015 වර්ල්ඩ්කප් එකේ ශ්‍රී ලංකාව සහ එංගලන්තේ අතර තිබ්බ මැච් එකෙන් ඊයේ අපි විකට් 9කින් දින්නා... ලකුණු 310ක් ඕවර් 47කදී එක විකට් එකක් විතරක් අවුට් වෙලා හඹාගෙන ගිහිං දිනනවා කියන්නේ ලොකු දිනුමක් තමයි.

ඊයේ මැච් එකේදී අපේ ටීම් එකේ රෙකෝඩ් කීපයක්ම කැඩුනා. වර්ල්ඩ්කප් එකකදී අඩුම වයසෙන් සෙන්චරියක් ගැහුව ශ්‍රී ලාංකිකයා බවට තිරිමාන්න පත්වෙද්දි, බෝල 70කින් 100 ගහලා සංගක්කාර තමන්ගේ වේගවත්ම 100 සටහන් කරගත්තා. ඒ වගේම පළවෙනි විකට් එකට ආයෙත් ලකුණු 100ක සම්බන්ධතාවයක් තියාගන්න ඩිල්ෂාන්, තිරිමාන්න ජෝඩුවට පුළුවං උනා... දෙවෙනි විකට් එකට තිබ්බ නොබිදුණු ලකුණු 212ක සම්බන්ධතාවයත් වර්ල්ඩ්කප් රෙකෝඩ් එකක්...

හැබැයි ඒක මහා ලොකු දිනුමක්ද?
ඊයේ මැච් එක ගැහුව විදියට සෙල්ලම් කළොත් අපිට මේ සීරීස් එකේ ඉස්සරහට යන්න පුළුවංද?

මේ ගැන කතා කරන්න නං ඊයේ මැච් එකේ අපි සෙල්ලම් කරපු විදිය ගැන අදහසක් ගන්න වෙනවා...

ඊයේ මැච් එකේදී ඒ ගහපු ලකුණු 312 ඔච්චර ලේසියෙන් ගහන්න හැකි උනේ එංගලන්තේ දුර්වල පන්දු යැවීම සහ දුර්වල නායකත්වය නිසා කියන බව අමතක කරන්න හොඳ නැහැ. අඩුම ගානේ ඇෆ්ගනිස්ථානේ මැච් එකේදී ඇෆ්ගන් නායකයා අපිට ඇටෑක් කරපු තරම්වත් ඊයේ එංගලන්ත නායකයා තමන්ගේ පන්දු යවන්නන් සහ පන්දු රකින්නන් යොදවලා ඇටෑක් කළේ නැහැ... එහෙම කළා නං ඊයේ තරඟේ තීරණේ ඔය තරං පහසුවෙන් විසඳගන්න ලැබෙන එකක් නැහැ කියන එකයි මගේ අදහස.

ඒ වගේම දැනට අපිට තියෙන ලොකුම ප්‍රශ්නේ අන්තිම ඕවර 10 බෝල් කෙරිල්ල.
ඊයේ මැච් එකේදිත් අන්තිම ඕවර් 10ට ලකුණු 103ක් ගැහුවා එංගලන්තේ...
ඒ 103න් 90ක්ම ආවේ අන්තිම් ඕවර 7ට... ආසන්න වශයෙන් ඕවරේකට ලකුණු 13ක්...
 

අන්තිම ඕවර් 10දී
මාලිංග ඕවර් 3ක් ලකුණු 24 (RPO 8), ලක්මාල් ඕවර් 2ක් ලකුණු 28 (RPO 14)
මැතිව්ස් ඕවර් 2ක් ලකුණු 18 (RPO 9), තිසර ඕවර් 1 ලකුණු 25 (RPO 25)
හේරත් ඕවර් 2ක් ලකුණු 11 (RPO 5.5) විදියට තමයි ඔය ලකුණු 103 දුන්නේ...

මේ බෝලර්ස්ලා 5න් 3ක්ම ෆුල් ටයිම් බෝලර්ස්ලා. එහෙම අය බෝල් කරලත් ඕවරේට ලකුණු 10ක් ගහනවා එංගලන්තේ වගේ ටීම් එකක්...

ඕස්ට්‍රේලියාවේ මැක්ස්වෙල්, දකුණු අප්‍රිකාවේ ඩිවිලියර්ස්, ඉන්දියාවේ දෝනි/රයිනා වගේ උන්දැලාට අහු උනෝතින්, 150කින් මෙහා නවතින්නේ නැහැ අන්තිම ඕවර් 10යේ ලකුණු දිවිල්ල... අපි පිළිගන්න ඕනේ දේ තමයි, අවසාන ඕවර් 10යේ අපේ පන්දු යැවීම දුර්වලයි...

ඒ වගේම තමයි පන්දු රැකීම.
ඊයේ මැච් එකේදීත් ආසන්න වශයෙන් විකට් ගන්න තිබ්බ චාන්ස් 4ක් අපි මිස් කළා...
වෙනදාට තමන්ගේ අහළින් උඩින් හෝ බිමින් වැරදිලාවත් බෝලයක් යන්න නොදෙන ඩිල්ෂාන් මේ වර්ල්ඩ් කප් එකේදී එහෙම කරන්නේ ඇයි කියන එක මට ලොකු ප්‍රශ්නයක්. ඒ වගේම සීරීස් එකේ ඉන්න අනිත් ටීම් එක්ක ගත්තම අපේ ෆීල්ඩිං ස්ටෑන්ඩර්ඩ් එක තියෙන්නේ බොහොම පල්ලෙහායින්... ඔය ගැහුව ලකුව 309න් අවම ලකුණු 20ක්වත් අඩු කරගන්න තිබ්බා ෆීල්ඩිං හොඳට තිබ්බානං... ලකුණු 20ක් කියන්නේ මැච් එකක තීරණේ වෙනස් කරන ලකුණු ගාණක්...

දැං බලමු පන්දුවට පහර දීම...
බැට් කරන්න ආව ගමංම මිස් කරන්න කැච් එකක් දෙන්නේ කොහොමද කියන එකට උත්තරේ දන්නේ තිරිමාන්නම තමයි. තිරිමාන්නගේ හොඳ හෝ නරක වෙලාවට ඊයෙත් තිරිමාන්න දුන්න කැච් එක එංගලන්තේ මිස් කළා... ඒ වගේම තමන්ගේ සෙන්චරිය අතර මගදීත් තව ආසන්න අවස්තා දෙකක් විතර තිරිමාන්න දුන්නා... එංගලන්තේ ඒවා ප්‍රයෝජනේට නොගත්ත එක ගැන දැං ඔවුන් කණගාටු වෙනවා ඇති. නමුත් අපේ පැත්තේ තියෙන ප්‍රශ්නේ එහෙම්මම තියෙනවා තවම. ඒකට විසඳුමක් නැතුවද තව ඉස්සරහට යන්නේ...

දැනට පළවෙනි 4 දෙනාම ලකුණු අතරේ ඉන්න එක සතුටට කාරණයක්. ඒ වගේම තිසරත් තමන්ට ලැබුන චාන්ස් එකකදී පීඩනේ මැද්දෙන් ලැජ්ජාව බේරගෙන ලකුණු කීපයක් එක්කහු කරගත්තා. පිතිකරණය දැනට ශේප්. හැබැයි කොලිටි බෝලිං ඇටෑක් එකකදී අපේ බැටිං ෆේල් කියන එක පළවෙනි නිව්සීලන්ඩ් මැච් එකේදිම පැහැදිලිවම පෙන්නුවා...

ටීම් සිලෙක්ෂන් එකේ ඉඳලාම තිබ්බ සංකල්පීය ගැටළු ටික තවමත් ඒ ආකාරයෙන්මයි තියෙන්නේ. කව්රු මොනවා කොහොම කිව්වත් තවම ටීම් එක 100%ක් බැලන්ස් නැහැ කියන එක පිළිගත යුතුයි. ආරංචි විදියට හේරත්ගේ වම් අත තමයි ඊයේ තුවාල වෙලා තියෙන්නේ. ඊළඟ මැච් එකට තව සතියක කාලයක් තිබුණත් ඒ කාලය තුළදී හේරත්ට සනීප වෙන්න වෙලාව තියෙයිද කියන ප්‍රශ්නේ තියෙනවා. ඒ වගේම සචිත්‍ර සේනානායකව එක්කගෙන ගිහිං තියෙන්නේ ඕස්ට්‍රේලියාවේ සහ නවසීලන්තේ සාරවත් තණභූමි පෙන්නන්නද කියලා මම දන්නේ නැහැ. හේරත් සම්පූර්ණයෙන්ම සනීප නොවුනොත් සචිත්‍රට අවස්ථාවක් ඒවි කියලා විශ්වාස කරන්න පුළුවනි. ඒ වගේම සුරංග ලක්මාල්ට සාපේක්ෂව කුලසේකර අත්දැකීම් සහ දක්ෂතාවයන්ගෙන් ඉස්සරහින් ඉන්නවා කියන එකයි මගේ පෞද්ගලික මතය. ඒකනිසා ඊළඟ ඕස්ට්‍රේලියානු මැච් එකේදීවත් කුලසේකරට අවස්ථාවක් දිය යුතුයි කියන තැන මම ඉන්නවා. මොන විදියකින් හරි තිර්මාන්න ඊයේ 140ක් ගැහුව නිසා ආරම්භක පිතිකරු ස්ථානයේ දිගටම ඉන්න ඔහුට පුළුවනි. ඒ කියන්නේ උපුල් තරංග ඊළඟ මැච් එකේදීත් බංකුවට වෙලා ඉඳීවි. 

දුෂ්මන්ත චමීර සහ තරංග පරණවිතාන ගැන මොකුත් නොකියා ඉන්නං. සමහර විට ස්කොට්ලන්ඩ් මැච් එකේදී ඒ දෙන්නගෙන් කෙනෙක්ට හෝ දෙන්නටම චෑන්ස් එකක් වදීවි සෙල්ලං කරන්න. නැත්තං ඉතිං ඕස්ට්‍රේලියාවේ නවසීලන්තේ සිරි නරඹන්න ගියා කියල හිත හදාගන්න ඒ දෙන්නට පුළුවං වෙයි.

ලීග් ස්ටේජ් එකේ තව මැච් දෙකක් ඉතුරුයි.
ඒ ඕස්ට්‍රේලියාව සහ ස්කොට්ලන්තේ අතර මැච් දෙක. 

ඔය දෙකම දින්නත් අපි ඉතුරු වෙන්නේ A2 කියන ස්පොට් එකේ. ක්වාටර් ෆයිනල් සඳහා එන්නේ B3 කියන ස්ලොට් එකේ තියෙන රට. දැනට තියෙන තත්ත්වේ අනුව වෙස්ට් ඉන්ඩීස්, අයර්ලන්ඩ්, සිම්බාබ්වේ, සහ පාකිස්ථානේ කියන රටවල් 4න් ඕනෙම එකක් B3 කියන ස්ලොට් එකට එන්න පුළුවනි. මේ ඉන්න තත්වෙං ඔය රටවල් 4ට ගහන එක මහ අමාරුවක් වෙන්නේ නැහැ... එහෙම උනෝතිං සෙමි ෆයිනල් යන්න හැකියි අපිට.

ඕස්ට්‍රේලියාවට පැරදිලා ස්කොට්ලන්තේට තලාගත්තෝතිං අපි නවතින්නේ A3 කියන ස්පොට් එකේ. ඕකට අනිත් පැත්තෙං එන්නේ B2 කියන ස්ලොට් එකේ තියෙන රට. බොහෝ විට ඉන්දියාව හෝ දකුණු අප්‍රිකාව ඒකට එන්න පුළුවං. මේ ඉන්න තත්ත්වෙං ඔය රටවල් දෙක එක්ක සෙල්ලං කරනවා කියන්නේ, වර්ල්ඩ්කප් හීනේට අබ සරණයි තමයි. ක්වාටර් ෆයිනල් වලිංම හැරිලා එන්න පුළුවං ආයේ මව්රට බලා.

ලබන ඉරිදා (මාර්තු 08) ඕස්ට්‍රේලියාව එක්ක තියෙන මැච් එක අනිවාර්යෙන්ම දිනා ගත යුතු මැච් එකක්. ඒක දිනාගන්න එක මේ වර්ල්ඩ් කප් එකේ අනාගත පැවැත්ම උදෙසා මහෝපකාරී වෙනවා.

බැටිං, බෝලිං, ෆීල්ඩිං කියන අංශ 3ම තියෙන ඔය ප්‍රශ්න ටික ගොඩ දාගන්න අපේ ටීම් එකට ශක්තිය, ධෛර්යය සහ හැකියාව ලැබේවා කියලා මෙහේ ඉඳං ප්‍රාර්ථනා කරනවා ඇරෙන්න ක්‍රීඩාලෝලීන් විදියට අපිට වෙන කරන්න දෙයක් නැහැ.

හැබැයි ඉතිං 2007, 2011 දෙකේදීම ගේන්න බැරි වෙච්ච ලෝක කුසලානේ මේ පාරවත් ගෙනේවි කියන බලාපොරොත්තුව අපේ හිතවල තියෙනවා කියන එකත් ටීම් එකේ ඉන්න සියල්ලෝම දන්නවා... 

 

අපි බලමු!!!